Policia e Tiranës ka vënë në pranga një 53-vjeçar, pasi u kap në flagrancë teksa po përgatitej të hynte për të vjedhur në një banesë në Farkë. Arrestimi u krye në kuadër të operacionit ‘Lugina e Errët’, të zhvilluar nga shërbimet e Komisariatit të Policisë Nr. 1. Në pranga ra 53 vjeçari me iniciale A.K, banues në Durrës, i cili sipas Policisë ka precedentë të mëparshëm penalë për krime kundër personit dhe pronës. Nga ky operacion, janë sekuestruar nga policia një armë zjarri pistoletë, municion luftarak, dy kaçavida, një palë pinca, dy kapele, një maskë e zezë, një palë doreza dhe një shumë parash. Nga hetimet ka rezultuar se 53-vjeçari dyshohet të jetë i përfshirë edhe në dy raste të tjera vjedhjesh dhe tentativash për vjedhje banesash në zonën e Farkës. Sipas Policisë, më 31 maj të këtij viti, 53 vjeçari dyshohet se ka vjedhur një shumë parash në një banesë ndërsa më 5 qershor po të këtij viti ka tentuar të vjedhë në një banesë tjetër.