Policia e Vlorës ka arrestuar 29-vjeçarin, Granit Pepnikajn, të shpallur në kërkim për mashtrim kompjuterik. Pepnikaj u arrestua në zonën e Drimadhës, në Vlorë, teksa mësohet se qëndronte i fshehur në një rezidencë. Në pranga ka rënë dhe një 31 vjeçar, i dyshuar si bashkëpunëtor i Pepnikajnt. Të arrestuarit dyshohen se kanë përfituar shuma të mëdha parash përmes skemave mashtruese të call center-ave. Të dy ishin në kërkim dhe ndaj tyre ishte caktuar masa e sigurisë “Arrest në burg” nga Gjykata e Tiranës. Gjatë kontrollit në vilën ku qëndronin, policia gjeti dhe sekuestroi një pistoletë dhe një sasi të lëndës narkotike cannabis. Në pranga përfundoi edhe një 28-vjeçar nga Tirana, i dyshuar se i kishte ndihmuar dy të kërkuarit të fshiheshin. Materialet i kanë kaluar Prokurorisë për veprime të mëtejshme.