Policia e Durrësit ka finalizuar me sukses operacionin e koduar "Pallati", për zbardhjen e vjedhjeve në banesat e dëmtuara nga tërmeti. Pas informacioneve që janë siguruar në rrugë operative, policia vuri në pranga një 35-vjeçar me precedentë të mëparshëm penal në fushën e vjedhjes. Pas hetimeve janë zbardhur dhe dokumentuar 7 vjedhje të ndodhura gjatë muajve të fundit në qytetin e Durrësit. Specialistët për Hetimin e Krimeve në Komisariatin e Policisë Durrës, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve përpara përgjegjësisë penale, si rezultat i një pune të mirorganizuar, në kuadër të operacionit të koduar "Pallati", arrestuan në flagrancë shtetasin me inicialet Xh. K., 35 vjeç. Ky shtetas, gjatë muajve të fundit, ka kryer disa vjedhje në qytetin e Durrësit, duke u futur në banesat e dëmtuara nga tërmeti që janë të braktisura nga banorët, ku ka vjedhur sende dhe orendi të ndryshme. Këto vjedhje i ka kryer kryesisht gjatë muajve, prill, maj dhe qershor të këtij viti, kur shumë prej njerëzve ishin të izoluar nga pandemia. Ai ka vjedhur mobilje, matësa të energjisë elektrike, por edhe kondicionerë.