Autoritetet kolumbiane kanë arrestuar në qytetin Tunja, shqiptarin Genti Krasniqi një nga më të kërkuarit nga Interpol dhe drejtësia italiane për trafik ndërkombëtar heroine. Sipas të përditshmes kolumbiane El Tiempo, ai ishte maskuar si turist për të shmangur vëmendjen. Ndërkohë prangosja e tij u bë pasi u zbulua gjatë një procedure që po bënte në Zyrën e Emigracionit. Burime të “El Tiempo” bëjnë me dije se ai kishte hyrë në Kolumbi që në vitin 2023 dhe kishte qëndruar në Bogotá dhe qytete të tjera. Lëvizja e tij drejt Tunjas besohet se lidhet me faktin se pasaporta i kishte skaduar, dhe mendonte se në një qytet më të vogël nuk do të binte në sy, duke shmangur zbulimin e Interpol. Ai është një emër i njohur pasi në vitin 2016 prokuroria e Milanos zbuloi sasi të mëdha heroine që vinin nga Tirana të cilat mendohet se ishin trafikuar nga Krasniqi, emri i të cilit rezulton dhe në dosje gjyqësore ku përmendet si pjesë e një rrjeti trafikantësh droge që përdorte prostituta për të transportuar ngarkesat e lëndëve narkotike nëpër Europë. Aktualisht ai ndodhet në paraburgim, në pritje të kërkesës zyrtare për ekstradim nga Italia.