Vetëm disa ditë pasi Policia e Shkodrës zbuloi një rast të përfshirjes së shtetaseve braziliane në rast prostitucioni, një tjetër episod i ngjashëm është goditur në kuadër të operacionit të koduar “STORM” në Durrës. Gjatë kësaj faze të operacionit u arrestuan dy shtetase braziliane, të cilat kishin marrë me qira një apartament në lagjen nr. 2 të Durrësit dhe dyshohet se e përdornin për ushtrim prostitucioni dhe konsumim të lëndëve narkotike. Gjatë ndërhyrjes së forcave policore, të dyja shtetaset refuzuan të hapnin derën, e cila u hap më pas me ndihmën e zjarrfikëses. Po ashtu, u procedua në gjendje të lirë një shtetas 22 vjeç, për veprën penale “Prostitucioni”. Gjatë kontrollit të apartamentit u sekuestruan si prova materiale dy pasaporta, shuma parash në euro dhe lekë, tre telefona celularë, një bllok shënimesh, disa karta SIM, si dhe sasi të vogla lënde narkotike të dyshuara kanabis.