Dy persona janë arrestuar nga Policia e Fierit, pasi janë kapur duke shkaktuar zjarre në zona të ndryshme të qarkut, ndërsa dy të tjerë janë proceduar penalisht për zjarrvënie të shkaktuara nga pakujdesia. Në fshatin Eskaj të Lushnjës, është arrestuar në flagrance një 60-vjeçari i cili, sipas Policisë, u konstatua duke ndezur qëllimisht zjarr në tokën që kishte marrë me qira. Ndërkohë, në fshatin Hasturkas, në zonën e mbrojtur Divjakë-Karavasta, është arrestuar një 25-vjeçar, i cili dyshohet si autor i një zjarrvënieje në grykëderdhjen e lumit Seman. Zjarri përfshiu bimësi dhe një sipërfaqe të konsiderueshme të pyllëzuar, pjesë e zonave të mbrojtura. Policia ka proceduar edhe dy persona të tjerë, përkatësisht 71 dhe 77 vjeç, pasi dyshohet se kanë ndezur zjarre në tokat e tyre, në fshatin Varibop të Fierit dhe në fshatin Çërrilë të Mallakastrës. Në këto raste, për shkak të erës së fortë, flakët kanë dalë jashtë kontrollit dhe janë përhapur në sipërfaqe me bimësi. Materialet procedurale i janë referuar Prokurorisë së Fierit për veprën penale ‘shkatërrimi i pronës me zjarr’.