Tre persona kanë përfunduar në prangat e Policisë së Durrësit, pasi dyshohen si autorë të dy rasteve të zjarrvënies në territorin e qarkut. Dy prej tyre, 48-vjeçari Ilir Rika dhe 59-vjeçari Reshit Jaheshi u arrestuan për zjarrin e rënë në një sipërfaqe bujqësore në fshatin Ishëm. Sipas Policisë, dy të arrestuarit ndodheshin në një banesë ku po prisnin tuba hekuri me gur fresibël. Shkëndijat e krijuara gjatë punës dyshohet se shkaktuan zjarrin, i cili më pas u përhap në tokat bujqësore përreth. Flakët përfshinë dhjetëra hektarë tokë, duke djegur qindra pemë frutore dhe ullinj. Ndërkohë, në një rast tjetër, Policia arrestoi 44-vjeçarin Shaban Domi, dyshohet se kishte ndezur zjarr në fshatin Rreth të Shijakut. Si pasojë e flakëve u dëmtuan tela të rrjetit elektrik dhe sipërfaqe me bimësi. Për të tre të arrestuarit rëndon akuza për “Shkatërrimi i pronës me zjarr”, ndërsa për rastin e Shijakut materialet i janë referuar Prokurorisë edhe për veprën penale “Shkatërrimi i rrjetit elektrik”.