Policia e Tiranës ka zbuluar një laborator të falsifikimit të dokumenteve të ndryshme shtetëroe, nga ato shkollore, deri te certifikata, licenca dhe vendime gjyqësore. Operacioni i goduar ‘Gjeneralitetet’ çoi në pranga tre persona, dy prej të cilëve babë e bir dhe një bashkëpunëtor i tyre. Sipas policisë, babai dhe djali i tij, shtetasit me iniciale H.M., 53 vjeç dhe S.M., 24 vjeç, kishin shndërruar banesën e tyre në laborator falsifikimi dokumentacioni zyrtar kundrejt pagesave që varionin nga 3 deri në 5 mijë euro. Gjatë kontrolleve rezultoi se të arrestuarit kishin përshtatur banesën e shtetasve H. M. dhe S. M., në fshatin Rrushkull, Durrës, për falsifikim të dokumenteve si: diploma, dokumente shkollore të tjera, certifikata, vërtetime gjyqësore dhe dokumente për aplikime në institucione të ndryshme. Në këtë ambient u gjetën 2 vula false, 6 celularë dhe 3 kompjuterë, si dhe dhjetëra dokumente të dyshuara false.