Mbi 770 kilogramë kokainë ultra e pastër, me një vlerë të përllogaritur prej 250 milionë eurosh, është sekuestruar në portin e Vado Ligure në Itali. Droga ishte fshehur mes tufave të bananeve në një ngarkesë të ardhur nga Ekuadori. Ajo që tërhoqi vëmendjen e hetuesve nuk ishte vetëm sasia e madhe e kokainës, por edhe një detaj i pazakontë, në paketat e drogës ishte stampuar flamuri serb. Sipas autoriteteve, këto shenja nuk vendosen rastësisht, por përdoren nga rrjetet e trafikut si një lloj “kodi” për të identifikuar pronarin, organizatën kriminale ose destinacionin e ngarkesës. Kombet e Bashkuara dhe Interpoli mbajnë një bazë të dhënash me simbole dhe logo të përdorura në paketat e drogës, pasi ato ndihmojnë hetuesit të lidhin ngarkesa të ndryshme me të njëjtat grupe kriminale. Flamuri serb konsiderohet tashmë një pistë e rëndësishme për identifikimin e organizatorëve të kësaj dërgese.