Doganat kanë goditur një rast të kontrabandimit të cigareve duke kapur 636 mijë paketa në pikën kufitare të Hanit të Hotit në Shkodër Sipas njoftimit të Ministrisë së Financave pas një analize risku dhe dyshimeve të arsyeshme, mbi të dhënat e dokumentacionit shoqërues të një ngarkese me paketa cigare të mbërritura në Degën Doganore të Hanit Hotit, Shkodër, nga Mali i Zi, strukturat doganore ushtruan kontroll në mjetin e tipit trajler me targa të Bullgarisë, i cili ka hyrë në territorin shqiptar nga Mali i Zi. Pas kontrollit fizik nga strukturat doganore, rezultoi se ngarkesa prej 1 272 koli cigare, ose 636 mijë paketa të markës “PRESIDENT”, nuk ishte e pajisur me pullë fiskale të Republikës së Shqipërisë apo të ndonjë vendi tjetër. Trajleri së bashku me sasinë e mallit u sekuestruan dhe sipas vlerësimeve të specialistëve, nëse ky mall do të hidhej në treg, vlera e detyrimeve doganore që duhet të paguhej është afro 1 miliardë lekë.