Një operacion antidrogë u zhvillua nga policia e Elbasanit. Rreth 45 kilogramë kanabis u sekuestruan ndërsa në pranga mësohet se përfunduan tre persona. Aksioni u zhvillua mes policisë së Elbasanit dhe asaj të Shkodrës, pas informacioneve të siguruara në rrugë operative. Sipas burimeve policore, operacioni u shoqërua me ndjekjen e një automjeti që dyshohej se transportonte lëndën narkotike. Në hyrje të qytetit të Elbasanit, drejtuesi i mjetit ka kuptuar se po ndiqej nga forcat e rendit dhe ka tentuar të largohej me shpejtësi, duke u futur në një rrugë të pandriçuar në një lagje periferike. Por aty ai bashkë me dy personat e tjerë u prangos. Hetimet për rastin vijojnë intensivisht, pasi dyshohet se grupi kriminal e ka shtrirë aktivitetin e tij prej kohësh në të paktën tre qarqe të vendit. Strukturat hetimore po punojnë për identifikimin dhe kapjen e personave të tjerë të përfshirë në këtë rrjet të trafikut të drogës. Gjatë aksionit u sekuestrua dhe një armë luftarake, municion, një sasi e konsiderueshme parash, si dhe disa telefona celularë me karta SIM shqiptare dhe të huaja.