Autoritetet policore sekuestruan më shumë se 2.6 tonë kokainë në brigjet e Portugalisë në Atlantik. Sasia e drogës u gjet në bordin e një gomoneje për lundrim në det të hapur, sipas Policisë Financiare italiane. Në pranga kanë përfunduar dy shtetas spanjollë, një banor i Gjibraltarit dhe një shtetas shqiptar me vendbanim në Itali. Operacioni është zhvilluar në bashkëpunim me autoritetet spanjolle dhe portugeze, ndërsa hetimet u koordinuan nga prokurorët italianë të Breshias. Vlera e kokainës në tregun me shumicë vlerësohet në rreth 78 milionë euro, ndërsa pas bashkimit me substanca të tjera, në tregun me pakicë, ajo mund të gjeneronte të ardhura prej rreth 500 milionë eurosh. Shtetas shqiptarë janë përfshirë vazhdimisht në hetime ndërkombëtare për trafikimin e kokainës nga Amerika e Jugut drejt Evropës. Sipas agjencive evropiane të zbatimit të ligjit, rrjetet kriminale kanë zgjeruar aktivitetin e tyre veçanërisht në tregtinë e kokainës, duke shfrytëzuar rrugët detare që lidhin Amerikën e Jugut me Evropën.