Reshjet e dendura të shiut po shkaktojnë kaos në bosnje hercegovinë. Në territorin e komunës së Jabllanicë është raportuar për viktima pas reshjeve të shiut që nuk u ndalën gjatë gjithë natës e që shkaktuan rrëshqitje dheu në Bosnje e Hercegovinë. Kryetarja e qarkut, Marija Buhac, konfirmoi lajmin por nuk specifikoi se sa viktima janë regjistruar. "Fatkeqësisht, sipas informacioneve të para, kemi edhe viktima në njerëz. Kemi kërkuar ndihmë nga Forcat e Armatosura të Bosnjës dhe Hercegovinës që të dërgojnë një helikopter për të shpëtuar jetën e një fëmije në Jabllanicë”, tha ajo gjatë një konference të jashtëzakonshme për shtyp në Mostar, të premten. Adill Shuta, komandanti i Shtabit të Mbrojtjes Civile të Qarkut të Hercegovinës dhe Neretvës, njëherësh zyrtari përgjegjës për financat, tha se autoritetet kanë angazhuar të gjitha forcat e disponueshme, dhe shtoi se ato “po përparojnë nga Mostari drejt Jabllanicës", ndërsa në një pjesë e fshatit Buturoviq Pole, mes Jabllanicës dhe Konjicës, gjendja është “kritike”. Një zëdhënës i autoriteteve lokale tha se qarkullimi rrugor është plotësisht i ndërprerë, ndërkaq linjat e komunikimit telefonik janë dëmtuar pjesërisht në zonën e Jabllanicës dhe Konjicës. Ai konfirmoi se ka pasur rrëshqitje të dheut dhe dalje të lumenjve nga shtrati dhe se rrugët nga Jabllanica drejt veriut dhe qytetit Prozor-Rama janë shembur. Zyrtarët kanë bërë thirrje që askush të mos tentojë të udhëtojë nga Mostari drejt Jabllanicës dhe Konjicës, sepse nëse do ta bënte do të rrezikonte jetën e tij. Nga Njësia e Zjarrfikësve të Jabllanicës thanë se ekipet janë në terren dhe se situata është kritike. Zjarrfikësit thanë se disa pjesë të rrugëve janë mbyllur për shkak të reshjeve të mëdha të shiut dhe rrëshqitjeve të dheut nga Konjici deri në Mostar, si dhe në drejtimin Prozor-Rama-Jabllanicë. Qarkullimi i trenave ndërkohë është pezulluar mes sarajevës dhe caplinës. Në mostar, përmbytjet e mëdha raportohet se kanë shembur edhe disa ura. Reshjet kanë po ahstu zhytur nën ujë pjesë të komunave Kiselak, Kreshevo dhe Fojnica, në pjesën qendrore të Bosnjës.