Presidenti rus Vladimir Putin thuhet se e ka mënjanuar ministrin e tij të jashtëm, veteranin Sergei Lavrov, në atë që mund të konsiderohet një rënie spektakolare në Kremlin. Lavrov, 75 vjeç, është "dënuar" pasi zemëroi administratën Trump dhe bllokoi takimet e nivelit të lartë. Një burim i paidentifikuar i tha të përditshmes ruse pro-Kremlin, Kommersant, se Lavrov kishte "munguar" në disa evente pa dhënë shpjegime. Lavrov ka qenë diplomati i ashpër i Rusisë për 21 vjet, duke fituar nofkën "Doktor Jo" për bllokimet e tij të pamëshirshme dhe refuzimin për të bërë kompromis me Perëndimin. Ai është zhdukur nga sytë e publikut ditët e fundit, duke nxitur zëra për trazira të reja në zemër të Kremlinit. Lavrov mungoi në seancën e Këshillit të Sigurisë të mbajtur të mërkurën dhe u shkarkua nga roli i tij i hershëm si drejtues i delegacionit rus në samitin e G20-ës që do të mbahet këtë muaj në Afrikën e Jugut. Për herë të parë, kjo detyrë i ka shkuar Maxim Oreshkin, një person i brendshëm i Kremlinit. Putin nuk mund të marrë pjesë vetë në G20 për shkak të një urdhër-arresti ndërkombëtar për rrëmbimin e fëmijëve ukrainas. Deri më tani, Lavrov gjithmonë e kishte zëvendësuar atë, një privilegj që tani i është hequr papritur. Në paraqitjen e tij të fundit publike me Putinin në fund të tetorit, Lavrov dukej i tensionuar dhe i tërhequr ndërsa ata pritën ministrin e jashtëm të Koresë së Veriut në Kremlin. Burime të tjera sugjerojnë se Lavrov, i cili kohët e fundit tha se nuk kishte probleme shëndetësore, ka pritur të dalë në pension, por deri më tani është refuzuar nga Putini. Media ruse thotë se ministri i jashtëm po fajësohet për dështimin për të siguruar një takim të ri Putin-Trump në Budapest, Hungari. Faji rrjedh nga ajo që burime të brendshme e quajtën "një telefonatë katastrofike" që Lavrov zhvilloi me Sekretarin amerikan të Shtetit Marco Rubio më 21 tetor. Thuhet se kjo telefonatë prishi humorin e Uashingtonit dhe e shtyu Trumpin të anulonte samitin. Ka zëra se një hetim mund të ketë nisur për rolin e lavrov ndërsa putin kërkon një kurban për të shpjeguar dështimin e Rusisë për të fituar mbështetje ndërkombëtare në luftën në Ukrainë.