Konfuzioni mbizotëroi në autostradat gjermane të enjten, në fillim të një prej periudhave të pushimit, më të ngarkuara të vitit, pasi Google Maps gabimisht tregoi se pjesë të mëdha të tyre ishin të mbyllura. Njerëzit që përdorin shërbimin e navigimit rreth qendrave të mëdha urbane si Frankfurti, Hamburgu dhe Berlini në autostradat midis Gjermanisë perëndimore, veriore, jugperëndimore dhe qendrore u përballën me harta të mbushura me një mori pikash të kuqe që tregonin bllokim. Fenomeni preku edhe pjesë të Belgjikës dhe Holandës. Ata që mbështeteshin te Google Maps mbetën me përshtypjen se pjesë të mëdha të Gjermanisë ishin bllokuar. Situata u përkeqësua nga fakti se një numër i madh gjermanësh ishin në rrugë në fillim të një pushimi katër-ditor. Raportet çuan në bllokimin e rrugëve alternative dhe vonesa të gjata ndërsa njerëzit nxitonin të gjenin rrugë devijuese. Policia dhe autoritetet e kontrollit të trafikut rrugor u detyruan t'u përgjigjeshin një fluksi kërkesash ndërsa njerëzit i kontaktonin për ndihmë. Shoferët që përdornin aplikacione alternative si Apple Maps ose Ëaze, ose që ndiqnin lajmet e trafikut në radiot e tyre, morën një pamje krejtësisht të kundërt, duke reflektuar realitetin se trafiku vazhdonte lirshëm dhe rrugët ishin të hapura. Shkaku i këtij problemi është ende i paqartë. Një zëdhënës i Google i tha mediave gjermane se po shqyrtoheshin informacionet dhe kompania po përpiqej të kuptonte se cfarë kishte ndodhur.