Drejtoria e Përgjithshme e Burgjeve ndërmori një aksion të befasishëm të paraditen e së shtunës në burgun e Fierit, ku gjatë kontrolleve zbuloi në disa qeli sende të paligjshme, teksa procedoi penalisht në gjendje të lirë gjashtë punonjës të burgut. Kontrollet zbuluan sasi droge gjatë kontrollit personal ndaj një të paraburgosuri, teksa sasi të konsiderueshme pijesh alkoolike si dhe disa celularë të vendosur në mjediset e përbashkëta të institucionit. Në këtë operacion u arrestua në flagrancë i burgosuri me inicialet A.M., që dyshohet si organizatori i futjes së sendeve të paligjshme në institucion. Ky shtetas rezulton i dënuar me 12 vjet burg për vrasje me dashje. Procedimi penal në gjendje të lirë nisi për gjashtë punonjës të burgut, përfshirë shefin e policisë në këtë institucion, shefin e regjimit të brendshëm, një specialist policie dhe ndaj tre kontrollorëve.