Afati i aplikimeve për anëtarë të këshillit drejtues të radio televisionit shqiptar përfundoi dhe më 10 mars komisioni i medias fillon seancat dëgjimore me kandidatët që kanë shprehu interesin. Në një listë që Top News disponon janë 57 emra kandidatës që kanë shfaqur interesin, të cilët i takojnë fushës së gazetarisë, aktrimit, muzikës dhe arteve të tjera. Këta emra garojnë për 11 vende vakante në këshillin drejtues të RTSH-së, pas shkrirjes të gjithë strukturës ekzistuese për shkak të shkeljeve të kryera në procesin e zgjedhjes së drejtorit të përgjithshëm të televizionit publik shqiptar. Në seancën plenare të 17 shkurtit socialistë e demokratë shkarkuan nga detyra me shumicë votash Leka Bungon, Gëzim Podgoricën, Genc Përmetin, Albert Mingën, Ardita Reçin, Dionis Papadhimitrin, Edmond Tullumanin, Ëngjëll Ndocajn, Ilir Kekon, Mevlan Shanajn dhe Milena Selimin. Neni 10 i statutit të RTSH-së parashikon që drejtori i përgjithshëm duhet të ketë përvojë pune jo më pak se dhjetë vjet nga të cilat pesë në pozicione menaxhimi në media. I njëjti kriter është i detyrueshëm edhe për emërimin e zëvendësdrejtorit të përgjithshëm. Vetë ish kryetari i këshillit drejtues të këtij televizioni, Leka Bungo gjatë seancës dëgjimore në komisionin e medias, pranoi se kriteret u shkelën në përzgjedhjen e Aurora Polos fillimisht si zëvendësdrejtoreshë dhe më pas në procesin e votimit të këshillit drejtues për ta caktuar si drejtoreshë të përgjithshme. Pas largimit të ish drejtorit të përgjithshëm të radiotelevizionit shqiptar, Alfred Pezës, filloi procesi për zgjedhjen e pasardhësit të tij, ku një nga kandidaturar ishte dhe zëvendësdrejtoresha, Aurora Polo. Në këtë proces u konstatuan shkelja nga deputetët e komisionit të medias.