Kancelari i Gjermanisë duket se e ka shmangur për pak poshtërimin pasi rezultatet paraprake sugjeruan se partia e tij ka mundur të lërë pas të djathtën ekstreme në landin e tij. Partia Social Demokrate e qendrës së majtë të Olaf Scholz fitoi zgjedhjet rajonale të së dielës në bastionin Brandenburg me vetëm një ose dy pikë, sipas exit-polleve nga dy transmetuesit kryesorë publikë. Alternativa për Gjermaninë (AfD) kishte një shans për të fituar në landin që është qeverisur nga SPD që nga ribashkimi i Gjermanisë në 1990. Por pasi votimi përfundoi në orën 18:00, exit-pollet e vendosën SPD-në të parën me 31-32% të votave, kundrejt 29-30% të AfD-së. Zgjedhjet, në periferi të Berlinit, u ndoqën me interes të madh pasi AfD u bë partia e parë e ekstremit të djathtë që fitoi zgjedhjet shtetërore në Gjermani që nga Lufta e Dytë Botërore, në shtetin lindor të Turingisë, më 1 shtator. Në të njëjtën ditë, ajo u rendit e dyta në Saksoni. Një fitore e AfD-së në zgjedhjet e së dielës do t'i kishte dhënë një goditje të rëndë shpresave të Scholz-it për një mandat të dytë në zgjedhjet federale të Gjermanisë vitin e ardhshëm.