Bashkëpunimi mes Kinës dhe Gjermanisë nuk është një "rrezik", por një garanci për lidhje të qëndrueshme dhe një mundësi për të ardhmen, tha të martën presidenti kinez Xi Jinping, mes ankesave nga BE për mallrat kineze që vërshojnë në tregjet e bllokut. Zinxhirët industrialë dhe të furnizimit të Kinës dhe Gjermanisë janë thellësisht të ndërlidhur dhe tregjet e tyre shumë të ndërvarur, i tha Xi Jinping kancelarit gjerman Olaf Scholz në Pekin. “Ne duhet të zhvillojmë marrëdhëniet dypalëshe në një mënyrë të gjithanshme dhe nën një perspektivë afatgjatë dhe strategjike”, tha presidenti kinez. Pas takimit të tyre të dytë në Pekin që nga nëntori 2022, të dy ata shëtitën nëpër ambjentet e rezidencës shtetërore Diaoyutai, një kompleks i madh me vila, liqene dhe kopshte, ku janë pritur shumë liderë të huaj.