Të gjithë anëtarët e Bashkimit Evropian duhet të rrisin shpenzimet e tyre të mbrojtjes për të mbushur boshllëqet në aftësitë e bllokut dhe për të siguruar mbështetje të vazhdueshme për Ukrainën, tha kancelari i ri i Gjermanisë Friedrich Merz në Paris të mërkurën. "Vetëm në këtë mënyrë mund t'i mbyllim gradualisht boshllëqet tona në aftësitë mbrojtëse dhe të mbështesim kolektivisht Ukrainën", tha Merz në një konferencë për shtyp së bashku me Presidentin Francez Emmanuel Macron, gjatë së cilës të dy udhëheqësit premtuan një fillim të ri për Evropën të nxitur nga bashkëpunimi franko-gjerman. Presidenti Macron tha në anën tjetër se Franca dhe Gjermania janë në kontakt të ngushtë në mbështetjen e tyre të palëkundur për Ukrainën dhe do të vazhdojnë të punojnë drejt një armëpushimi 30-ditor. "Ka vetëm një pyetje që kërkon përgjigje: A është Rusia gati për një armëpushim që zgjat të paktën 30 ditë në mënyrë që të jetë në gjendje të ndërtojë një armëpushim të fortë dhe të qëndrueshëm? A do ta mbajë në fund presidenti rus fjalën e tij, veçanërisht atë që ka dhënë gjatë bisedimeve me administratën amerikane?", tha Macron. Merz tha nga ana e tij se shpresonte që një armëpushim i përhershëm të mund të arrihej së shpejti për Ukrainën, por ai nuk ndërmori ndonjë angazhim për sigurinë e Ukrainës. Ky ishte udhëtimi i parë jashtë gjermanisë i Merz si kancelar, me një ndalesë në Poloni që është planifikuar pas Francës, ndërsa udhëheqësi konservator kërkon të rinovojë marrëdhëniet me aleatët kryesorë të Berlinit.