Një 41-vjeçar është arrestuar në Mallakastër, pasi dyshohet se kishte kultivuar bimë narkotike në një sipërfaqe toke shtetërore në fshatin Cfir. Operacioni i koduar “Burimi” u finalizua nga shërbimet e Komisariatit të Policisë Mallakastër, në kuadër të kontrolleve të intensifikuara për evidentimin dhe goditjen e rasteve të kultivimit të bimëve narkotike. Sipas policisë, në pranga është vënë shtetasi K. L., 41 vjeç, banues në fshatin Cfir, i cili dyshohet se kishte kultivuar rreth 80 bimë kanabisi në një sipërfaqe toke shtetërore, pranë tokës që ka në pronësi. Pjesa më e madhe e bimëve narkotike u asgjësua me djegie, ndërsa një pjesë e vogël u sekuestrua si provë materiale. Policia bën me dije se kontrollet për parandalimin dhe goditjen e kultivimit të bimëve narkotike do të vijojnë në të gjithë territorin. Materialet procedurale iu referuan Prokurorisë për veprime të mëtejshme.