Policia e Kurbinit ka vënë në pranga një 48-vjeçar këtë të diel, pasi shpërndante heroinë në zona të ndryshme, si edhe kishte kultivuar në oborrin e banesës së tij 144 bimë kanabisi. Sipas policisë, gjatë operacionit të koduar “Veprimtaria” u arrestua në flagrancë 48 vjeçari Saimir Keqi. Gjatë kontrollit në banesën e tij në fshatin Fushë-Kuqe, shërbimet e policisë gjetën dhe sekuestruan 776 gramë heroinë, si dhe një peshore elektronike. Po ashtu, në oborrin e banesës u konstatuan 144 bimë narkotike kannabis, të cilat u asgjësuan me anë të djegies, ndërsa një pjesë e tyre u sekuestrua në cilësinë e provës. Operacioni u zhvillua nga shërbimet e Komisariatit të Policisë Kurbin, në bashkëpunim me Forcën e Posaçme ‘Shqiponja’ dhe specialistët për hetimin e narkotikëve në Lezhë. Hetimet vijojnë në bashkëpunim me Prokurorinë për dokumentimin e plotë të veprimtarisë kriminale të të arrestuarit.