Të rinjtë në vendet e Ballkanit Perëndimor konsumojnë më së shumti kanabis sa i takon përdorimit të lëndëve narkotike. Shifra e një ankete të bërë nga Agjencia Europiane Drogës tregojnë se nga 4442 të anketuar, 42% e tyre ishin përdorues të kanabist. Më pas renditeshin medikamentet antidepresive pa recetë me 22% dhe kokaina me 21%. Në anketë u përfshinë të rinj të moshës 18 vjeç e lart, që kanë përdorur drogë vitin e kaluar nga Shqipëria, Bosnja Hercegovina, Kosova, Mali i Zi, Maqedonia e Veriut dhe Serbia. Sipas studimit më pak se 3% e të anketuarve raportuan se kishin marrë trajtim për të ndaluar përdorimin e ndonjë substance narkotike, shkruan Zëri i Amerikës. Pjesëmarrësit në anketim nga Ballkani Perëndimor raportuan arsye të ngjashme me të rinjtë europianë për përdorimin e drogës, thuhet në studim. Rreth 84% e të anketuarve që raportuan përdorimin e substancës narkotike “ekstazi” dhe mbi 50% që raportuan përdorimin e kokainës, amfetaminës dhe ketaminës, deklaruan se i kishin përdorur këto substanca “për argëtim”. Mbi 65% e atyre që raportuan përdorimin e kanabisit deklaruan se e kishin përdorur “për të reduktuar stresin” ose “për t'u çlodhur”. Shumica e pjesëmarrësve të anketës në Ballkanin Perëndimor që raportuan se përdornin substancë narkotike “ekstazi” thanë se bënë këtë në festivale muzikore (81%), ndërsa kokaina përdorej kryesisht në bare ose klube (71%).