Autoritetet franceze arrestuan të premten një person të dyshuar se kishte hyrë në konsullatën iraniane në Paris dhe pretendonte se mbante eksploziv. Hetuesit thanë se atij nuk i gjetën asnjë armë me vete apo lëndë plasëse, por autori u prangos nën akuzën e kërcënimit. Një burim policor më herët i tha AFP se misioni diplomatik thirri forcat e rendit pasi një dëshmitar pa "një burrë të hynte duke mbajtur një granatë ose një rrip shpërthyes". Forca të shumta policie rrethuan ambasadën iraniane ndërsa në të gjithë zonën u pezullua qarkullimi i automjeteve si dhe lëvizja e metrove. Kompania e transportit në Paris RATP shkroi në platformën X, dikur Tëitter, se trafiku ishte pezulluar në dy linja metroje që kalojnë nëpër ndalesa afër konsullatës. Ambasada dhe konsullata e Iranit në kryeqytetin francez ndajnë të njëjtën ndërtesë, por kanë dy hyrje të ndryshme në rrugë të ndara. Incidenti erdhi fill pas rritjes së tensioneve në Lindjen e Mesme ku Izraeli iu kundërpërgjigj sulmit iranian. I akuzuari do të dalë të hënën para gjykatës për tu njohur me masën e sigurisë.