Mbi 100 persona u plagosën kur dy trena u përplasën me njëri-tjetrin në Sllovaki. Rreth 800 pasagjerë ndodheshin në bordin e dy trenave kur u përplasën rreth 20 km në veri të kryeqytetit Bratislavë. Rreth 79 persona u dërguan me urgjencë në spital pas përplasjes, sipas zyrtarëve të emergjencave. 60 të tjerë u trajtuan për lëndime më të lehta, raporton Pravda. Tre prej tyre ishin në gjendje të rëndë me lëndime në gjoks dhe bark. Një zëdhënës i Spitalit Universitar të Bratislavës tha: "Gama e lëndimeve varion nga ato të lehta, si gërvishtje ose mavijosje, deri te ato të rënda që kërkojnë ndërhyrje kirurgjikale. Kishte politrauma të ndryshme, fraktura të gjymtyrëve, lëndime serioze në gjoks, bark ose kokë", tha ai. Më shumë se 60 oficerë policie dhe 70 zjarrfikës mbërritën në vendngjarje. Dy trenat e përfshirë në aksident ishin treni ekspres Tatran mes Kosice-s dhe Bratislavës dhe një tren ekspres rajonal mes Nitrës dhe kryeqytetit. Imazhet nga vendi i ngjarjes tregonin dy trenat e ndalur kokë më kokë. Ka spekulime se njëri nga trenat mund të ketë kaluar me semafor të kuq, sipas gazetës sllovake Nový Čas. Ivan Bednárik, drejtori i përgjithshëm i Hekurudhave Sllovake, tha se ky ishte ndoshta shkaku. Policia i testoi të dy drejtuesit për drogë dhe alkool, por të dy rezultuan negativë.