Kuvendi ka rrëzuar tre dekrete të Presidentit Ilir Meta për tre ligje që ai I kishte kthyer për rishqyrtim. Mazhoranca ka votuar për të rrëzuar dekretet për kthimin e ligjeve: ‘Për tatimin mbi vlerën e shtuar’, ‘Për prokurimet në fushën e mbrojtjes’, ‘Për ligjin e turizmit detar’. Këto ligje ishin miratuar më parë nga shumica në Kuvend, por Presidenti I ktheu pasi sipas tij kishin problem ligjore dhe cënonin interesin publik. Sidomos në ndryshimet në ligjin ‘Për tatimin mbi vlerën e shtuar’ ku specifikohej disa kategori mjetesh lundrimi se do të përjashtohen nga tatimi mbi vlerën e shtuar si mbështetje për turizmin, Presidenti ka sjellë edhe argument moral e joligjor. Sipas Metës ky ligj që përjashtonte nga taksat jahtet luksoze nuk ishte në harmoni me nevojat emergjente të vendit, si dhe me parashikimet e Institucioneve Financiare, të cilat raportojnë për përkeqësimin e situatës ekonomike në vendin tonë. Për dy ligjet e tjera kreu I shtetit rendiste disa argument ligjore, por pavarësisht kësaj Kuvendi I ka rrëzuar të gjitha pretendimet e Metës dhe në këtë mënyrë këto tre ligje do të hyjnë në fuqi.