Çmimet e disa prej produkteve bazë të konsumit vijuan të rriten gjatë qershorit 2026, me kafenë, limonët, perimet dhe produktet e bulmetit që shënuan rritje mbi mesataren e inflacionit, sipas të dhënave të INSTAT. Nga 45 artikujt e analizuar, 28 u shtrenjtuan, ndërsa 16 pësuan ulje çmimi krahasuar me të njëjtën periudhë të një viti më parë. Limonët regjistruan rritjen më të madhe, me 23.5%, duke arritur në 253.6 lekë për kilogram. Pas tyre renditet kafeja e bluar, e cila u shtrenjtua me 14.6%, ndërsa gazi i lëngshëm u rrit me 12.4% dhe vera me 11.2%. Rritje të ndjeshme shënuan edhe produktet e stinës. Kastravecët u shtrenjtuan me 9.9%, specat me 8%, ndërsa peshku i freskët me 8.4%. Në grupin e bulmetit, kosi natyral u rrit me 6.9%, ndërsa vezët me 5.2%. Në rritje ishin edhe vaji i ullirit, ullinjtë, mollët, gjiza dhe mishi i derrit. Edhe çmimet e mishit vijuan trendin rritës. Mishi i derrit u shtrenjtua me 3.6%, mishi i pulës me 2.1%, ndërsa mishi i qengjit, dashit dhe kecit u rrit me 2%. Çmimi i mishit të viçit mbeti i pandryshuar.