Spekulime i konsideroi diplomati europian, Silvio Gonzato, shqetësimet e ngritura nga opozita se procesi i integrimit të Shqipërisë në Bashkimin Europian ka mbetur në vend numëro, në pamundësi për të marrë dritën jeshile për raportin IBAR. Në çelje të javës së Europës, ambasadori Gonzato shpjegoi procedurën që po ndiqet në grupin e punës Coela, teksa kryeministri Edi Rama nënvizoi se tashmë në Bruksel po negocion Komisioni Europian. “Kam dëgjuar shumë spekulime për atë që po ndodh në Bruksel dhe më duhet të jem pak pedagogjik në qasjen time. Grupi i punës COELA është një grup pune që bën bashkë përfaqësues të shteteve anëtare, është një grup diplomatësh. Komisioni europian i ka dorëzuar këtij grupi pune raportin e IBAR-it, dhe ka bërë një vlerësim pozitiv. Shtetet anëtare nuk e hedhin në votë, por thjesht e diskutojnë. Dhe atë që duhet të bëjnë është të miratojnë një qëndrim të përbashkët që do të duhet të përkufizojë dhe shpjegojë piketat përmbyllëse, që do të duhet të plotësojë Shqipëria.” “Sot në Bruksel nuk negocion Shqipëria, por Komisioni. KE i konsideron të përmbushura detyrat e Shqipërisë për këtë fazë dhe për piketat e ndërmjetme. Dhe ai po diskuton me shtetet anëtare. Të thuash se u bllokua nga X apo Y është të shesësh ajër. Kush beson se ajri blihet, ta shesë! Sa i takon reformës zgjedhore, shefi i ekzekutivit, Edi Rama nënvizoi se Partia Socialiste nuk toleron imponime apo ultimatime, por ka parakusht uljen e numrit të deputetëve në Kuvend. Ambasadori Gonzato u shpreh se rekomandimet e OSBE/ODIHR janë njëkohësisht edhe pjesë e kritereve të ‘Themeloreve’.