Një qen një vjecar me emrin Rocco, ka filluar punë si inspektor cilësie për vozat prej druri të uiskit, në një distileri të Skocisë. Rocco nuhat, dhe cdo problem që gjen tek vozat e distilerisë së uiskit “Grant’s”, ia raporton drejtorit të përgjithshëm Chris Wooff, që sic shihet ka një mbiemër që i shkon fiks për shtat punëtorit leshator. “Druri është material natyral, dhe distilimi i uiskit është një proces organik, kështu që detyra jonë është të sigurohemi se vozat prej lisi janë në kushte perfekte për vjetërimin e uiskit,” thotë Wooff. “Nuhatja e një qeni si Rocco është 40 herë më e fortë se e njeriut, dhe ne e kemi stërvitur atë për të dalluar cdo erë të dyshimtë që mund të cenojë vjetërimin e uiskit,” shton ai. Rocco u trajnua 6 muaj për këtë punë dhe stafi i ka ndërtuar një kolibe të vecantë pranë distilerisë. Lianne Noble, e cila kujdeset për Rocco-n, thotë: “Atmosfera çelet menjëherë sapo Rocco fillon punën, dhe të gjithë janë të qeshur kur e kanë pranë. Ai është një qen që punon, dhe jo thjesht objekt argëtimi, kështu që ne zbatojmë disa rregulla për të mos e shqetësuar kur ka orarin e pushimit midis turneve. Është kënaqësi të shohësh efektin që ai ka në ngritjen e moralit të stafit,” e mbyll ajo duke qeshur.