Palestinezët në Gazë mëngjesin e së martës kanë raportuar për bombardime të ashpra në qytetet jugore të Kan Younis dhe Rafah, ku Izraeli ka urdhëruar civilët që të evakuohen. Bombat izraelite kanë goditur juglindjen e Kan Younisit dhe perëndimin e Rafahut, sipas raporteve lokale. Mijëra persona që po tentojnë të largohen nga Gaza janë mbledhur në Rafah. Aty gjendet pikëkalimi i vetëm kufitar që lidh këtë territor me Egjiptin. Ndërmjetësit ndërkombëtarë po bëjnë presion që të arrihet një marrëveshje që ndihma humanitare të arrijë në Gazë dhe që refugjatët dhe shtetasit e huaj të lejohen të largohen për në Egjipt. Detajet për numrin e viktimave nga bombardimet e reja ende nuk janë bërë publike. Izraeli ka urdhëruar mbi një milion palestinezë që të evakuohen nga veriu për në jug të Gazës, pasi po planifikon të nisë një sulm masiv ndaj militantëve palestinezë të Hamasit.