Diplomati amerikan Richard Grenell ka paralajmëruar kryeministrin Kurti dhe Kosovën për pasoja të rënda, nëse nuk u përmbahet angazhimeve të marra ndaj ndërkombëtarëve. Duke sjellë në vëmendje afatin e lënë nga ndërkombëtarët, nëpërmjet një postimi në “Twitter”, Grenell është shprehur se kryeministri Albin Kurti nuk e di ende se çfarë po ndodh me Kosovën. “Kurti nuk e kupton se çfarë po ndodh me Kosovën. Komuniteti ndërkombëtar i ka dhënë atij një afat deri të premten për t'iu përmbajtur angazhimeve që vendi i tij ka marrë më parë. Miqtë e mi në Kosovë duhet të përgatiten për pasoja të rënda nëse Kurti nuk e respekton afatin. Unë i kam parë pasojat dhe nuk është aspak e bukur”, shkroi Grenell në Twitter. Në reagimin e tij, Grenell komenton pikërisht deklaratën e kryeministrit Albin Kurti, se ‘Kosova nuk do të zgjidhë asgjë me presion apo sanksione dhe se marrëdhëniet e saj me SHBA-në dhe BE-në janë të shkëlqyera’. Situata në veri të Kosovës është e tensionuar që prej 26 majit, kur policia ndërhyri për të ndihmuar të hyjnë në zyrat komunale, kryetarët e dalë nga zgjedhjet e 23 prillit. Ndërkombëtarët kanë bërë apel për uljen e tensioneve dhe njëkohësisht kanë shtuar presionin ndaj Kosovës që të paraqesë sa më shpejt draftin e saj për Asociacionin e komunave me shumicë serbe në veri të vendit.