Joe Biden tha për BBC se presioni nga administrata Trump ndaj Ukrainës për t'i dhënë territore Rusisë është një përpjekje për "qetësimin e putinit”, në një intervistë ekskluzive, e para e tij që nga largimi nga Shtëpia e Bardhë. Duke folur në Delaëare, ai tha se Presidenti rus Vladimir Putin besonte se Ukraina ishte pjesë e Rusisë dhe "kushdo që mendon se do të ndalet" nëse ndonjë territor ukrainas do ti jepet atij si pjesë e një marrëveshjeje paqeje "gabohet rëndë". Biden, i cili foli ndërsa vendet aleate shënojnë 80-vjetorin e Ditës së Fitores në Evropë këtë javë, tha se ishte i shqetësuar për prishjen e marrëdhënieve mes SHBA-së dhe Evropës nën Presidentin Donald Trump, gjë që ai tha se "do të ndryshonte historinë moderne të botës". Në intervistë, Biden u sfidua për të kaluarën e tij në Ukrainë, si dhe vendimin e tij për t'i dhënë fund përpjekjes për rizgjedhje në vitin 2024 në fund të garës, pasi një performancë e dobët në debat ngjalli shqetësime mbi gjendjen e tij fizike dhe e zhyti Partinë Demokratike në krizë. Biden hoqi dorë nga gara më pak se katër muaj para zgjedhjeve të nëntorit, dhe kur u pyet nëse duhej të ishte larguar më herët ai tha: "Nuk mendoj se do të kishte rëndësi. Ne u larguam në një kohë kur kishim një kandidat të mirë. Gjërat lëvizën aq shpejt sa e bënë të vështirë largimin. Ishte një vendim i vështirë por ishte vendimi i duhur", tha ai.