Partia Demokratike e Rithemelimit vijon të forcojë procesin e Bashkimit të saj, e për këtë ndryshimet statutore që pritet të miratohen të martën, janë një prej hapave kryesorë. Këto ndryshime statutore parashikojnë që kreu i grupit parlamentar, kryetari apo nënkryetari i Kuvendit, kushdo qoftë ai, është njëherësh edhe nënkryetar i partisë. E në këtë drejtim, Gazment Bardhi si kryetar grupi e Agron Gjekmarkaj si nënkryetar Kuvendi, do të jenë nënkryetar partie. Por nuk është vetëm kaq, po në saj të një artifice të tillë, Këshilli Kombëtar pritet të miratojë edhe parashikimin tjetër, që kryetarët apo nënkryetarët e Komisioneve parlamentare, të jenë njëherësh edhe anëtar të Kryesisë. Kësisoj, në Kryesinë e Berishës do të jenë edhe deputetët Dhurata Cupi, Zheni Gjergji, Tomor Alizoti, Ferdinand Xhaferri, Helidon Bushati, apo edhe Ervin Salianji, i cili mban pozicionin e nënkryetarit te grupit parlamentar.