Sekretari amerikan i Mbrojtjes, Pete Hegseth, kritikoi 'gjeneralët e shëndoshë' dhe nismat e diversitetit që ai tha se çuan në dekada të tëra degradimi në ushtri dhe tha në një takim të rrallë me komandantët të martën se ata duhet të japin dorëheqjen nëse nuk mbështesin axhendën e tij. Hegsethit iu bashkua edhe Presidenti Donald Trump, i cili gjithashtu mbajti një fjalim para admiralëve dhe gjeneralëve të mbledhur në Quantico, të Virxhinias, ku hodhi idenë e shfrytëzimit të dislokimeve në qytetet amerikane si "vende stërvitore për ushtrinë". Vërejtjet nga Hegseth, një ish-personalitet i Fox Neës, dhe Trump, një ish-yll televiziv i reality shoë-ve, kishin elemente televizive pasi zyrtarët e lartë ushtarakë amerikanë u thirrën me urgjencë javën e kaluar, për të marrë pjesë në ngjarjen e improvizuar. "Udhëheqës politikë budallenj dhe të pamatur vendosën një drejtim të gabuar të busullës dhe ne humbëm rrugën”, tha Hegseth ndërsa hapi takimin. "Por jo më." Duke iu drejtuar një auditoriumi plot me zyrtarë të lartë që kishin ardhur nga e gjithë bota, Hegseth mbrojti shkarkimet e tij në departamentin e mbrojtjes, përfshirë gjeneralin më të lartë të SHBA-së, me ngjyrë, dhe admiralin më të lartë të Marinës, që është një grua, duke thënë se ata ishin pjesë e një kulture të prishur. Ai premtoi ndryshime rrënjësore në mënyrën se si Pentagoni trajton ankesat për diskriminim dhe heton akuzat për shkelje. Ai tha se sistemi aktual ka zyrtarë të lartë që ecin si mbi "lëvozhga vezësh". "Nëse fjalët që po them sot nuk ju pëlqejnë, atëherë duhet të bëni gjënë e duhur dhe të jepni dorëheqjen", tha Hegseth duke shtuar më pas se ishte "krejtësisht e papranueshme të shihje gjeneralë dhe admiralë të shëndoshë në korridoret e Pentagonit".