Parlamenti francez ka miratuar një legjislacion që ashpërson politikën e Francës për imigrim, pas disa muajve bllokadë. Projektligji i amenduar është përkrahur nga partia e qendrës, e presidentit francez, Emmanuel Macron, Rilindja, dhe partia e krahut të djathtë e Marine Le Penit, Marshi Kombëtar. Të majtët e kanë akuzuar Macronin se po bën lëshime për të djathtën ekstreme. Megjithatë, shumica ka qenë aq e madhe në dhomën e ulët të parlamentit, sa partia në pushtet nuk ka pasur nevojë për mbështetjen e Le Penit. Macron i tha partisë së tij, para votimit në Parlament, se nuk dëshiron që Marshi Kombëtar të ketë fjalën e fundit mbi këtë fitore. Ai tha se më përpara e dërgon dokumentin për rilexim, sesa ta miratojë atë falë mbështetjes së partisë së Le Penit – thanë burimet për agjencinë e lajmeve AFP. Me masat e reja, migrantëve u vështirësohet marrja e familjarëve në Francë, dhe u zgjatet periudha për të fituar akses në përfitimet e shtetit. Një draft paraprak i këtij dokumenti kishte dështuar të miratohej për shkak të kundërshtimeve të opozitës. Grupet për të drejta të njeriut, e kanë dënuar vendimin e marrë, duke e quajtur këtë ligj për migrimin, si ligjin më regresiv në dekada. Deputetët e së djathtës ekstreme dhe konservatorët e kanë përkrahur vendimin, ndërsa të majtët kanë shprehur zhgënjim. Partia e Macronit e ka humbur shumicën në parlament në zgjedhjet e korrikut të vitit 2022. Që atëherë, qeveria e tij ka pasur vështirësi disa herë që të çojë përpara projektligjet në parlament.