Shtetet e Bashkuara shpresojnë që të zhbllokojnë dërgesat me ndihmë për civilët në Gazën e rrethuar nga Izraeli pas sulmit brutal të militantëve të Hamasit. Punonjësit e ndihmave kanë paralajmëruar se jeta në Gazë është afër një kolapsi të plotë për shkak të rrethimit izraelit, ndërsa qindra mijëra persona po kërkojnë strehim, dhe në anën tjetër, furnizimet me ujë dhe energji po mbarohen në spitale. Në pikëkalimin në Rafah – që është pika e vetme që lidh Gazën me Egjiptin – dërgesat me ndihma po presin të nisen drejt territorit të vogël e të mbipopulluar, ndërkaq civilët e bllokuar – shumica palestinezë me shtetësi të dyfishtë – po shpresojnë se do të lejohen që të largohen për në Egjipt. Ndërmjetësit po tentojnë që të arrijnë një armëpushim për të hapur kufirin që u mbyll javën e kaluar pas sulmeve izraelite, por mëngjesin e së martës ishte e paqartë nëse kjo pikë kufitare do të vazhdojë të jetë e mbyllur. “Vazhdon të mos ketë ujë për shumicën dërrmuese të popullsisë në Gaza”, tha Juliette Touma, zëdhënëse e agjencisë së OKB-së që ndihmon palestinezët, UNRËA. “Bëhet fjalë për 2 milionë njerëz në Rripin e Gazës që nuk kanë ujë, dhe uji po mbaron, uji është jetë, dhe jeta po mbaron në Gaza”. UNRËA tha të hënën se nuk ka mjaftueshëm qefinë për të mbledhur trupat e të vdekurve në Gaza.