Kryedemokrati Sali Berisha iu drejtua me tone të ashpra socialistëve sa i takon kompanisë shtetërore Kayo, e konceptuar për rijetëzimin e industrisë ushtarake në vend, por që është përballur me akuza të shumta nga opozita se është implikuar në trafik ndërkombëtar armësh përmes izraelitit, Ron Yeffet. Berisha: “A keni ju interesin më të vogël njerëzor apo jeni ushtarë të Yeffet-it dhe Padrinos? Si mund të heshtni ju para këtij fakti? Kontrabandën e legjitimuat dhe bëjnë punët e pista të kryepisit. Në qoftë se qeveria porosit punë të pista, kryepis është ai që porosit punët, dhe është kryeministri. Si ka mundësi ta ndiqni ju këtë? Si ka mundësi?” Partia Socialiste e rrëzoi kërkesën e opozitës për të ngritur një komision hetimor për këtë çështje, me argumentin se kërkesa nuk plotësonte kriteret kushtetuese dhe ligjore.