Një raketë e lëshuar nga Jemeni drejt Izraelit, të dielën, ra afër aeroportit Ben Gurion, aeroportit kryesor ndërkombëtar të Izraelit. Për shkak të sulmin, autoritetet ndaluan përkohësisht trafikun ajror. Ushtria izraelite tha se po heton lëshimin e predhës të ardhur nga Jemeni, që përfundoi në afërsi të aeroportit. Disa njerëz që ishin në aeroport, kanë publikuar video të filmuara me telefona celularë që tregojnë tym të zi në afërsi, prapa një avioni të parkuar dhe ndërtesave të aeroportit. Shërbimi i emergjencave në Izrael tha se nuk ka raportime për lëndime serioze. Një burrë dhe një grua kanë pësuar lëndime të lehta dhe janë dërguar në spital, ndërkaq dy të tjerë janë trajtuar në vendngjarje. Autoritetet e aeroportit thanë se predha ra në një rrugë afër parkingut të Terminalit 3. Ministri i Mbrojtjes i Izraelit, Israel Katz, kërcënoi se “kushdo që do të na godasë, do të goditet shtatë herë më fuqishëm”. Rebelët jemenas Huthi kanë sulmuar Izraelin me raketa dhe dronë dhe po ashtu kanë sulmuar anijet në Detin e Kuq, duke thënë se po veprojnë në solidaritet me palestinezët, për shkak të luftës në Gazë. Të shtunën, rebelët jemenas thanë se kanë kryer sulmin e tretë me raketa ndaj Izraelit në dy ditë. Shumica e raketave të lëshuara nga rebelët Huthi, që nga fillimi i luftës në Gaza, janë penguar nga mbrojtja ajrore izraelite. Rebelët pezulluan sulmet e tyre gjatë armëpushimit dymujor në Gaza. Por, në mars ata kërcënuan me rinisje të sulmeve për shkak të bllokadës së ndihmave humanitare në Gazë, të vendosur nga Izraeli.