Hezbollahu ka lëshuar një breshëri raketash në Izraelin qendror të martën, duke bërë që të ndizen sirenat paralajmëruese për sulme ajrore në shumicën e pjesëve të banuara në Izrael. Megjithatë, sulmet e Hezbollahut duket se nuk kanë shkaktuar dëme apo viktima. Ushtria izraelite tha se pesë raketa u lëshuan nga Libani drejt Izraelit, duke shtuar se shumica e tyre u penguan nga sistemet e mbrojtjes ajrore të Izraelit, ndërkaq një raketë ra në një hapësirë të pabanuar. Izraeli tha se në të njëjtën kohë, rreth 15 predha u lëshuan nga Libani drejt veriut të Izraelit. Herët në mëngjes, Hezbollahu tha se ka lëshuar raketa drejt dy bazave të rëndësishme afër Tel Avivit dhe një baze detare në perëndim të Haifës. Sulmet me raketa vijnë në kohën kur Izraeli ka intensifikuar sulmet e tij në Liban, duke shënjestruar institucionet financiare që udhëhiqen nga Hezbollahu dhe teksa SHBA-ja po tenton të rinisë bisedimet për armëpushim në Gazë, pas vrasjes së Yahya Sinëarit, udhëheqësit të Hamasit. Kryeministri izraelit, Benjamin Netanyahu është zotuar se do ta zhdukë Hamasin dhe do të kthejë dhjetëra pengje që mbahen nga grupi. Hamasi ka thënë se pengjet do të lirohen kur të arrihet një armëpushim afatgjatë dhe kur Izraeli të tërhiqet plotësisht nga Gaza dhe të lirohen të burgosurit palestinezë.