Pas betimit të 140 deputetëve të zgjedhur më 11 maj, në Kuvend fillon puna për riorganizimin e komisioneve, teksa pritet edhe betimi i ministrave të kabinetit të ri qeveritar. Kryeparlamentari Niko Peleshi do të presë më 15 shtator, në orën 11, në kryesinë e kuvendit, kryetarët e grupeve parlamentare për të diskutuar propozimet e tyre sa i takon përbërjes së kryesisë e Byrosë së Kuvendit, sekretariateve, këshillin për rregulloren dhe mandatet, këshillin për legjislacionin dhe delegacionet e përhershme në organizatat ndërkombëtare. Të martë kryeministri Edi Rama udhëton drejt Brukselit ku do të mbahet konferenca për çeljen e grupkapitullit të radhës të negociatave për anëtarësimin e Shqipërisë në Bashkimin Europian. Në po të njëjtën ditë, pritet që në kryesinë e kuvendit të mblidhet këshilli për rregulloren dhe mandatet për të shqyrtuar propozimin e Partisë Socialiste, që shton numrin e komisioneve, redukton numrin e anëtarëve dhe le shtatë komisione në drejtimin e mazhorancës e katër në drejtim të opozitës. Gjithashtu po diskutohet mundësia që në 16 shtator të mblidhet edhe një seancë plenare pasdite për të kaluar me procedurë të përshpejtuar ndryshimet në rregulloren e kuvendit, që do i hapnin rrugën shtimit të numrit të komisioneve dhe rikonceptimit të objektit të punës së tyre. Konferenca e kryetarëve parashikohet të mblidhet më 17 shtator, ku do të vendoset programi i punës. Gjatë këtyre tre ditëve kryeministri Edi Rama pritet t’i ketë dërguar në presidencë emrat e ministrave të rinj të kabinetit qeveritar. Institucioni i presidencës do verifikojë pastërtinë e figurave të tyre, duke marrë të dhëna nga SHISH dhe nga Autoritetit të Dosjeve, dhe më pas do të nxjerrë dekretet individuale për secilin nga ministrat. Ky moment i hap rrugën mbledhjes së seancës të enjten, ku do të prezantohet programi i këshillit të minsitrave, që do të votëbesohet në parlament. Vetëm pas këtij votimi, ministrat do të mund të betohen në Presidencë për të filluar kështu punën në mandatin e katër qeverisës.