Japonia do të nisë negociatat për tarifat me Shtetet e Bashkuara në Uashington, një nga vendet e para që testoi gatishmërinë e Presidentit Donald Trump për të hequr dorë nga detyrimet gjithëpërfshirëse që kanë tronditur tregjet dhe kanë nxitur frikën e recesionit. Negociatori kryesor tregtar i Tokios, Ryosei Akazaëa, do të takohet me Sekretarin e Thesarit të Trump, Scott Bessent dhe përfaqësuesin e tregtisë Jamieson Greer për diskutime që mund të trajtojnë gjithashtu projektet e energjisë dhe çështjen e mprehtë të kursit të këmbimit. Edhe pse Bessent ka thënë se japonia ka "përparësi" pasi më shumë se 75 vende kanë kërkuar bisedime, kryeministri japonez Shigeru Ishiba ka thënë se aleati i ngushtë i SHBA-së nuk do të nxitojë për të arritur një marrëveshje dhe nuk planifikon të bëjë lëshime të mëdha. Japonia është goditur me taksa 24% për eksportet e saj në Shtetet e Bashkuara, megjithëse këto tarifa, si shumica e tarifave të Trump, janë ndërprerë për 90 ditë. Por një normë universale prej 10% mbetet në fuqi, si dhe një tarifë prej 25% për makinat, që përbëjnë një shtyllë të ekonomisë japoneze të varur nga eksporti. Ishiba, për momentin, ka përjashtuar kundërmasat.