Japonia ka vendosur mbrojtjen e saj raketore në alarm të hënën dhe paralajmëroi se do të rrëzojë cdo kërcënim që i kanoset territorit të saj pasi Koreja e Veriut njoftoi vendin për lëshimin e një sateliti mes 31 majit dhe 11 qershorit. Koreja e veriut tha se ka përfunduar ndërtimin e satelitit të parë spiun, ushtarak, të saj, dhe lideri Kim Jong Un ka miratuar përgatitjet finale për lancimin. Analistët thanë se sateliti është pjesë e një programi të mbikqyrjes teknologjike, që përfshin dronë, dhe që synon të përmirësojë kapacitetet e koresë së veriut të armatosur me armë bërthamore, për të goditur shënjestra në rast lufte. “Ne do të marrim të gjitha masat e mundshme kundër raketave balistike dhe raketave të tjera që konfirmohen se do të ulen në territorin tonë”, tha ministria japoneze e mbrojtjes. Ministria shtoi se do të përdorte sistemin e saj Standard Missile-3 ose atë Patriot PAC-3 për të shkatërruar raketat e Koresë së veriut. Kryeministri japonez, Fumio Kishida i tha gazetarëve se cdo lëshim rakete nga koreja e veriut do të ishte një shkelje serioze e rezolutave të këshillit të sigurimit të kombeve të bashkuara dhe dënoi aktivitetin bërthamor dhe raketor të vendit. “Ne i kërkojmë me forcë Koresë së Veriut të heqë dorë nga lancimi”, tha zyra e tij në një postim në Tëitter duke shtuar se vendi do të bashkëpunonte me aleatët e saj, SHBA-në, Korenë e jugut dhe vende të tjera dhe do të bënte gjithcka që është e nevojshme për të mbledhur dhe analizuar informacione nga cdo testim. Edhe Koreja e Jugut iu bashkua Japonisë në thirrjen drejtuar Koresë së Veriut për të hequr dorë nga lëshimi i planifikuar i satelitit.