78 vjet më parë Shtetet e Bashkuara lëshuan dy bomba atomike në Japoni, duke vrarë qindra mijëra civilë në Hiroshima dhe Nagasaki, sulm që i dha fund Luftës së Dytë Botërore. Kushtetua e Japonisë pas luftës vuri kufizime për forcat e armatosura, duke hequr dorë nga lufta si një e drejtë e vendit. Por tani, kërcënimet në rritje nga Kina fqinje dhe Koreja e Veriut kanë nxitur një ndryshim rrënjësor të qëndrimit të Tokios.Humbja në vitin 1945 bëri që Japonia të vinte kufizime për ushtrinë e saj. Në bazë të kushtetutës së pasluftës Japonia hoqi dorë nga lufta si një e drejtë kombëtare. Por ky qëndrim po ndryshon.Thirrjet për çarmatim po përballen me realitetin e një Indo-Paqësori gjithnjë e më të tensionuar dhe të militarizuar. Gjatë muajve të fundit Koreja e Veriut ka lëshuar dhjetëra raketa në Detin e Japonisë. Po ashtu, veprimet ushtarake të Kinës rreth Tajvanit dhe Detit të Kinës Jugore shihen si një kërcënim i drejtpërdrejt për Japoninë.“Ka një hendek të madh midis Japonisë dhe Kinës për sa i përket aftësive mbrojtëse. Tokio e pranon se duhet ta tejkalojmë këtë hendek. Publiku i gjerë japonez e mbështet udhëheqjen politike, sepse jemi dëshmitarë të asaj që ndodhi me Ukrainën”, thotë për Zerin e Amerikës Tetsuo Kotani nga Institutit Japonez për Marrëdhëniet Ndërkombëtare. Japonia synon që deri në vitin 2027 të dyfishojë shpenzimet e mbrojtjes dhe të fitojë aftësi goditëse kundër bazave të huaja, gjë që ka qënë e ndaluar për dekada me radhë. Gjithashtu po ndryshon edhe opinioni i publikut ndaj armëve bërthamore. Sipas ekspertëve, tani publiku në japoni pranon se duhet të mbështetemi tek ombrella bërthamore amerikane.Japonia po shkon drejt një epoke të re, duke hedhur poshtë qëndrimin e pasluftës dhe ndërtuar një ushtri të fuqishme. Ndërsa shuhen të mbijetuarit e bombave atomike, shpresa e tyre është që mësimet nga Hiroshima dhe Nagasaki të mos harrohen.