Presidenti amerikan Donald Trump i kërkoi kryeministres japoneze Sanae Takiachi të mos e përshkallëzojë më tej një mosmarrëveshje me Kinën, thanë burime me njohuri për çështjen, ndërsa ai përpiqet të ruajë një armëpushim të brishtë të luftës tregtare me Pekinin. Takaichi shkaktoi mosmarrëveshjen më të madhe diplomatike me Pekinin në vite kur i tha parlamentit këtë muaj se një sulm hipotetik kinez ndaj Tajvanit që kërcënonte Japoninë mund të justifikonte një përgjigje ushtarake. Deklarata e saj e zemëroi Pekinin, ndërsa japonia paralajmëroi qytetarët e saj kundër udhëtimeve në fqinjin e Azisë Lindore. Në një telefonatë me Takaichi-n, Trump tha se nuk donte të shihte përshkallëzim të mëtejshëm, thanë dy burime të qeverisë japoneze. Megjithatë, Trump nuk bëri kërkesa specifike ndaj Takaichi-t, tha një nga burimet, duke sugjeruar se ai nuk i dha rëndësi thirrjes së Pekinit për tërheqje. Japonia ka thënë se komentet e saj pasqyrojnë politikën afatgjatë të qeverisë. Biseda telefonike me kryeministren japoneze erdhi pasi Trump foli me Presidentin Kinez Xi Jinping, i cili i tha udhëheqësit amerikan se kthimi i Tajvanit në Kinë ishte thelbësor për vizionin e Pekinit për rendin botëror, tha agjencia zyrtare e lajmeve Xinhua. Tajvani i qeverisur në mënyrë demokratike hedh poshtë pretendimin e sovranitetit të Pekinit. Trump, i cili planifikon të udhëtojë për në Pekin në prill, nuk ka thënë nëse bisedimet do të përfshijnë edhe Tajvanin, duke thënë në vend të kësaj se dy ekonomitë më të mëdha të botës kanë lidhje "jashtëzakonisht të forta" dhe janë afër finalizimit të një marrëveshjeje të gjerë tregtare. Në Tokio, disa zyrtarë janë shqetësuar prej kohësh se Trump mund të jetë i përgatitur të zbusë mbështetjen për Tajvanin në kërkim të një marrëveshjeje tregtare me Kinën, një veprim që ata kanë frikë se do ta inkurajojë Pekinin dhe do të shkaktojë konflikt në një Azi Lindore gjithnjë e më të militarizuar.