Një grua e moshuar rreth të 90-tave, është shpëtuar nga rrënojat e një shtëpie dy katëshe, kur kishin kaluar më shumë se pesë ditë nga tërmeti i fuqishëm që goditi japoninë. Skuadrat e shpëtimit e gjetën gruan në qytetin Suzu, në prefekturën Ishikava, të shtunën në mbrëmje, 124 orë pas tërmetit, dhe e cuan atë në një spital të afërt. Të dielën, një mjek i tha gazetarëve se gruaja e moshuar ishte në gjendje të mirë, aq sa mund të bënte edhe biseda, por kishte lëndime në këmbë. Një pjesëtar i skuadrave të shpëtimit tha se gjunjtë e të moshuarës ishin bllokuar nga një orendi shtëpiake dhe se kishte patur një hapësirë shumë të vogël mes katit të parë dhe të dytë, ku ajo ishte bllokuar. Ishin dashur disa orë punë për të zhbllokuar këmbët e saj. Tërmeti me magnitudë 7.5, goditi japoninë qendrore më 1 janar, duke ndezur edhe një alarm për tsunami deri në rusinë lindore. Mijëra njerëz që jetonin në zonat bregdetare u detyruan të evakuoheshin nga shtëpitë ndërkohë që ndërtesa e rrugë u shkatërruan. Shumë struktura po ashtu u dogjën. Numri i viktimave të katastrofës është të paktën 126, sipas të dhënave më të fundit të ndara nga autoritetet japoneze të shtunën. Në rastet e katastrofave natyrore, 72 orët e para janë kritike për përpjekjet e kërkimit dhe shpëtimit. Ekspertët e quajnë këtë periudhën e artë për gjetjen e të mbijetuarve pasi kushtet e njerëzve të bllokuar nën rrënoja, apo të lënduar, mund të përkeqësohen shpejt pas kësaj periudhe. Shtrirja e plotë e dëmeve nuk është ende e ditur por më shumë se 200 persona konsiderohen ende të zhdukur. Operacionet e kërkimit po vazhdojnë ndërkohë në Ishikava.