Presidenti i Ukrainës, Volodymyr Zelensky, tha se synon të ofrojë tokën ruse që forcat ukrainase e kanë nën kontroll në rajonin e Kurskut, në Rusi, në këmbim të territorit të pushtuar nga Rusia, nëse Ukraina dhe Rusia ulen për të biseduar për përfundimin e luftës. “Ne do ta shkëmbejmë një territor për një territor tjetër”, tha Zelenski në një intervistë për gazetën britanike Guardian. Megjithatë, ai shtoi se nuk e di se cilin territor do të kërkonte Kievi nga Moska në këmbim të pjesës së rajonit të Kurskut. “Nuk e di, do ta shohim. Por, të gjitha territoret tona janë të rëndësishme, nuk ka prioritet këtu”, tha Zelenski. Në të kaluarën, presidenti ukrainas kishte hedhur poshtë mundësinë e dorëzimit të territorit të pushtuar nga Rusia, e cila nisi pushtimin e plotë të Ukrainës në vitin 2022. Zelensky, i cili do të takohet me zëvendëspresidentin amerikan JD Vance dhe zyrtarë të tjerë amerikanë në Konferencën e Sigurisë në Munih, tha se është i gatshëm për bisedime serioze. Presidenti amerikan, Donald Trump, i cili ka qenë skeptik për vazhdimin e mbështetjes amerikane për Kievin, po shtyn për një marrëveshje për përfundimin e luftës dhe ka rritur përpjekjet diplomatike ditët e fundit. I dërguari i tij për Rusinë dhe Ukrainën, Keith Kellogg, do të marrë pjesë gjithashtu në Konferencën e Sigurisë në Munih dhe më pas do të udhëtojë për në Ukrainë. Trump është ankuar për koston e ndihmave që Shtetet e Bashkuara i kanë dhënë Ukrainës dhe ka thënë se SHBA do të kërkojë diçka në këmbim.