Fuqitë evropiane i thanë Shteteve të Bashkuara javën e kaluar se cilat aspekte të një marrëveshjeje të mundshme paqeje midis Ukrainës dhe Rusisë do të ishin të panegociueshme për ta, përpara një raundi të ri diskutimesh të mërkurën, tha ministri i Jashtëm francez Jean-Noel Barrot. Ukraina, SHBA, Franca, Britania dhe Gjermania zhvilluan bisedimet e tyre të para të përbashkëta që kur presidenti Donald Trump erdhi në pushtet, të enjten në Paris, duke ndarë pikëpamjet e tyre mbi mënyrat për t'i dhënë fund luftës më shumë se trevjeçare. Zyrtarë të lartë, përfshirë sekretarin e shtetit të SHBA-së, Marco Rubio, do të takohen sërish në Londër të mërkurën. "Objektivi i vetëm që na shqetëson është të mbrojmë interesat franceze dhe sigurinë evropiane. Kjo është arsyeja që ndërsa SHBA vendoset në një pozicion ndërmjetësues, ne i bëjmë ata të dëgjojnë se cilat janë "vijat tona të kuqe"", tha Barrot duke iu referuar çështjeve që për liderët evropianë nuk janë të kapërcyeshme. Por, ai nuk dha detaje. I pyetur nëse ai mendonte se pohimi i Trump se një marrëveshje paqeje mund të shpallej këtë javë ishte i besueshëm, Barrot tha se kjo varet nga presidenti rus Vladimir Putin. "Unë mendoj se armëpushimi i Pashkëve që Putin dekretoi, çuditërisht ishte një operacion marketingu, një operacion joshjeje që synonte të zbuste Presidentin Trump" tha Barrot. Pavarësisht shkeljeve të përsëritura të armëpushimit, ai tha se kishte patur një rënie minimale të intensitetit në lidhje me dronët dhe raketat me rreze të gjatë veprimi, që ndoshta mund të hapin derën për një armëpushim të mëtejshëm.