Ministri i Mbrojtjes, Ermal Nufi, bëri të ditur se Këshilli i Ministrave pritet të marrë javën e ardhshme një vendim lidhur me mundësinë e dërgimit të trupave shqiptare në Gaza, në kuadër të misioneve ndërkombëtare për ruajtjen e paqes. Sipas tij, më herët është zhvilluar një mision për vlerësimin e situatës në terren, ndërsa në fazën e radhës drejtuesit e shtabit do të kryejnë vlerësime konkrete për mundësinë e angazhimit të trupave shqiptare. Gjatë deklaratës për mediat, Nufi foli edhe për marrëveshjen e huasë me Shtetet e Bashkuara të Amerikës, me vlerë 300 milionë dollarë. Ai sqaroi se fondet do të përdoren për blerjen e mjeteve dhe pajisjeve të reja ushtarake, në funksion të modernizimit të kapaciteteve mbrojtëse të vendit, në përputhje me angazhimet e Shqipërisë në NATO. Ministri u ndal edhe te rekrutimet në Forcat e Armatosura, duke theksuar se kërkesat për t’u bërë pjesë e ushtrisë janë rritur me mbi 90%.