Ushtria izraelite njoftoi se ka vrarë kreun e krahut ushtarak të Hamasit gjatë një sulmi ajror në Gaza. Ai konsiderohej një nga figurat më të rëndësishme të Hamasit dhe zyrtari më i lartë i vrarë nga Izraeli që prej armëpushimit të arritur në tetor me mbështetjen e SHBA-ve. Një zyrtar i Hamasit konfirmoi vdekjen, ndërsa më vonë lajmi u pranua publikisht edhe nga zëdhënësi i Hamasit në Gaza. Në Gazën qendrore u zhvillua ceremonia mortore për Izz al-Din al-Haddad, bashkëshorten dhe vajzën e tyre 19-vjeçare, ndërsa burime palestineze thanë se ai u vra gjatë një bombardimi izraelit mbi një pallat. Kryeministri izraelit Benjamin Netanyahu deklaroi se Haddad ishte një nga organizatorët e sulmeve të 7 tetorit 2023 ndaj Izraelit dhe e akuzoi për vrasje, rrëmbime dhe sulme ndaj civilëve izraelitë. I njohur me nofkën “Fantazma”, Haddad kishte mbijetuar disa atentate më parë dhe pas vrasjes së Mohammad Sinëar në maj 2025 kishte marrë drejtimin ushtarak të Hamasit në Gaza.