Ish-presidenti i Shteteve të Bashkuara, Barack Obama, i bëri thirrje Izraelit më 23 tetor të jetë i matur në operacionet ushtarake në Rripin e Gazës, pas sulmeve të 7 tetorit nga grupi militant Hamas në qytetet jugore izraelite. “Mbi të gjitha është e rëndësishme që Ushtria e Izraelit t’i përmbahet ligjit ndërkombëtar, përfshirë ligjeve që kërkojnë shmangien e viktimave dhe vuajtjeve të popullatës civile”, shkroi Obama në platformën online, Medium. Mijëra palestinezë kanë humbur jetën deri më tani si pasojë e bombardimeve në Gaza, shumica e të cilëve fëmijë, tha ish-presidenti amerikan, duke shtuar se qindra mijëra njerëz në këtë vend janë zhvendosur. Obama theksoi se pas “brutalitetit të papërshkrueshëm” të Hamasit, Izraeli ka të drejtë t’i mbrojë qytetarët e tij por “bota po shikon me vëmendje”.